Kompressor yağı yalnız kompressorda qalmır; bir hissəsi vurulan buxarla birlikdə sistemə sürüklənir. Yağ evaporatorda toplansa istilik keçidini pozur, gücü düşürür və kompressora geri qayıtmasa kompressor yağsız qalıb yastıq yandırır. Yağ ayırıcı vurma xəttində yağı buxardan ayırır və üzgəcli mexanizmlə kompressor karterinə geri yollayır.
Hər sistemdə lazım deyil. Qısa xətli, tək evaporatorlu, orta temperaturlu kiçik soyuducu kameralarda yağ öz-özünə qayıdır; boru diametrləri və sürət düzgün seçilibsə ayırıcıya ehtiyac yoxdur. Uzun və ya yüksələn xətlər, aşağı buxarlanma temperaturu (−25 °C və aşağı; yağ soyuqda qatılaşır), çoxkompressorlu mərkəzi sistemlər və vintli kompressorlarda isə yağ ayırıcı məcburidir.
Mərkəzi sistemlərdə yağ ayırıcı ilə birlikdə yağ rezervuarı və hər kompressora yağ səviyyəsi regulyatoru var; yağ idarəsi bu sistemlərin ən kritik mövzusudur. Yağ ayırıcı seçilərkən kompressor gücü, agent və vurma xətti diametri əsas götürülür; ayırıcının qızdırıcısı dayanma zamanı içindəki agentin yağla qarışmasının qarşısını alır.